Demonstrata e 10 shkurtit. Dhjetëra mijëra qytetarë të Kosovës iu përgjigjën ftesës së Lëvizjes VETËVENDOSJE! për ta demonstruar vendosmërinë tonë në kundërshtim të pakos së Ahtisaarit dhe ndarjes territoriale, fetare dhe institucionale të Kosovës që e bën kjo pako, vetëm e vetëm për ta mbajtur Kosovën si pjesë të Serbisë. Policia i bllokoi rrugët ku marshonin demonstruesit paqësor dhe intervenoi dhunshëm kur demobstruesit deshën të kalojnë për ta vazhduar marshin e tyre. Arben Xheladini dhe Mon Balaj u vranë, ndërsa 82 demonstrues të tjerë u plagosën, disa rëndë, nga plumbat e gomës që i përdori policia. 15 demonstrues u arrestuan.
Të shtunën në orën 14:30 ne i udhëhoqëm aktivistët tanë dhe njerëzit nga të gjitha anët e Kosovës në një marsh paqësor nëpërmes qendrës së Prishtinës. Marshi ynë ishte planifikuar të fillojë në orën 14:00 por u vonua për shkak se autobusët që ne kishim organizuar për qytetarët jashtë Prishtinës u ndaluan në mënyrë sistematike dhe u kontrolluan nga ana e KFOR-it. Një autobus nga Skënderaj u dërgua në bazën e KFOR-it dhe u mbajt atje derisa u kontrolluan dokumentet e njerëzve brenda autobusit. Ky është kuptimi i vërtetë i lëvizjes së lirë dhe të drejtës së lirë për grumbullim/protestim në Kosovë.
Një kordon i madh i policisë kishte bllokuar rrugën që çon në ndërtesën e UNMIK-ut. Ne nuk u konfrontuam me atë kordon sepse rruga jonë, sikurse edhe me 28 Nëntor, ishte të kalojmë kah Nëna Tereze dhe ndërtesa e qeverisë, dhe pastaj të vazhdojmë në rrugën kryesore të Prishtinës të kalojmë ndërtesën e UNMIK-ut, dhe të kthehemi në zyren tonë. Kur arritëm afër ndërtesave qeveritare, një kordon i madh i policisë kundër protestave me tanke kishin ngritur barrikada në rrugë. Ne ndaluam te barrikada. Pati një numër fjalimesh. Pastaj, Albini kërkoi nga policia ta lirojnë rrugën në mënyrë që të vazhdojmë marshin tonë në mënyrë të qetë dhe paqësore përgjatë rrugës së njëjtë të cilën e përshkuam me 28 Nëntor. 'Këto janë rrugët tona' tha ai. Nëse rruga nuk do të lirohej, vazhdoi ai njerëzit do të vazhdojnë të marshojnë dhe do të thyenin barrikadat dhe kordonin e tyre. Policia refuzoi ta lironte rrugën. Aktivistët filluan të bërtasin 'hapeni rrugën, hapeni rrugën' dhe pastaj larguan barrierat, dhe duke lidhur duart, u shtynë me kordonin policor. Nuk kishim armë përveç trupave tanë. Menjëherë, njësitë speciale ndërkombëtare filluan të gjuajnë gazin lotsjellës, dhe të gjuajnë me plumba të gomës dhe ata nga plastika, duke përfshirë plumba metali të veshur me gomë. Nuk kishte fare distancë në mes policisë dhe protestuesve.
Ulpiana Lama, zëdhënësja e kryeministrit, përshkroi ndërhyrjen e policisë si proporcionale dhe profesionale. Tani ajo ndodhet në 'pushime'. Stephen Curtis, Komisionari Ndërkombëtar i Policisë, pretendonte që ne kishim për qëllim të hynim në ndërtesën e qeverisë dhe prandaj ishim përgjegjës për krijimin e konfliktit. Qëllimi ynë nuk ishte kurrë të hynim në ndërtesë. Ne ishim të paarmatosur! Albin Kurti deklaroi qartë se ne kërkonim nga policia ta lironte rrugën në mënyrë që të vazhdonim marshin tonë. Policia e UNMIK-ut pretendoi që reagimi i tyre ishte i nevojshëm sepse në protestën tonë të fundit, me 28 Nëntor, u thyen disa xhama të ndërtesës së Qeverisë, asaj të Kuvendit dhe të UNMIK-ut. Prandaj, për shkak që u thyen 17 dritare dy muaj më parë, u pa e domosdoshme që të vriten qytetarët? Policia nuk ka ndihmuar të plagosurit. Ata bile qëlluan kanistra me gaz lotsjellës në tri Ambulanca të Kryqit të Kuq kur ato ishin të vendosura në mes të turmës dhe radhëve të policisë, duke penguar kështu njerëzit t'iu afrohen atyre.
Pas sulmit të parë, njerëzit u rigrupuan afër Hotelit Iliria. Policia vazhdoi të afrohej, duke qëlluar me plumba gome dhe plastike, si dhe me gaz lotësjellës. Ata përdoren dy lloje të gazit lotsjellës. Njerëzit u plagosën dhe lënduan nga kanistrat e gazit lotsjellës që fluturonin në ajër, dhe nga ato më të mëdha dhe më vdekjeprurëse, të qëlluara horizontalisht. Kjo betejë zgjati për gati 4 orë, derisa Albin Kurti kërkoi nga masa e njerëzve të ktheheshin në shtëpitë e tyre dhe të prisnin për organizimin e demonstratës së radhës.
Aktivistët u kthyen në selinë tonë ku menjëherë mbajtën një konferencë shtypi për të dënuar përdorimin e tmerrshëm të dhunës nga ana e policisë. Pas gjysmë ore dhe pasi që mediat ishin larguar; policia speciale thyen zyren tonë, hodhi gaz lotsjellës brenda zyrave, dhe i detyroi të gjithë aktivistët e pranishëm të shtriheshin përtokë në mënyrë që të arrestonin Albin Kurtin. Gjatë rezistimit të arrestimit u lëndua rëndë aktivistja Shkurta Aliu, e cila u godit me bombolë gazi në pjesën e pasme të kokës. Ajo u dërgua në qendrën emergjente e alivanosur. Njëkohsisht lëndime të lehta pësuan edhe disa aktivistë të tjerë aty kryesisht nga gazi dhe shufrat e gomës.
Tags: VETEVENDOSJE UCK ALBIN KURTI
