For di oranan di mainta trempan un gran kantidat di shofur ku ta den akshon tabata riba pia, prinsipalmente na e paradanan di bus den Punda i Otrabanda.
Mester bisa ku kos a kuminsa mas trankil ku ayera, pero den e sigiente oranan e shofurnan a kuminsa blokia entradanan n'e paradanan di bus na Waaigat i Paris, pa asina e tourbus-nan ku gobiernu a pone disponibel pa pasaheronan awe no por drenta. Te ku e ora ei, e shofurnan nó a kometé niun akto drastiko, manera bahamentu i boramentu di tayernan di shofurnan di bus ku no ta den akshon. Pero, sí nan ta gritando i zundrando e shofurnan ku si ta koriendo nan rutanan normal awe. Tambe un truck lo mester a basha grijs riba parti di Caracasbaaiweg, nèt despues di Sorsaka, pa asina stroba trafiko mainta trempan. Ta sospechá ku esaki ta konektá na e akshon di STU. Mester bisa si ku pa ora ku nos kamarografo a yega na e sitio ya e grijs a keda halá un banda, pero por mira ainda e espasio grandi ku esaki a tuma riba kaya. Na varios otro sitio na Korsou tabatin hopi konfrontashon entre shofurnan di bus i polis mientras ku entre e shofurnan mes tabatin basta kis-kis pasobra esun ta den akshon i e otro no. Hopi pasahero a bolbe keda na pia awe of a warda basta un par di ora pa haña bus pa asina sigui pa nan destinashon. E akshonnan di bus chiki ta kontinua ya ku no tabatin ningun reunion ku gobiernu awe pa trata na yega na un akuerdo ku otro.
Tags: telecuracao telenotisia curacao.korsou notisia
