利玉芳與張芳慈客家詩朗讀
●嫁 / 利玉芳
耳環仔叮噹搖
在我介耳公邊講出嫁介心情
隻隻金指 含著傳統介情愛
首扼仔落在我介左右手
一圈一圈都係祝福
阿爸送我三從四德
阿姑包分我一句話
喚我莫忘祖宗言
雖然蒙等一層濛濛介面紗
我也讀得出
這本沉長介禮數
新娘車背響起嚴肅介落聲
我會珍惜潑出去介這碗水
紙扇輕輕跌落地
阿姆撿起搖清涼
自言自語唸四句
公婆相惜 早供賴賴
對於客家人介行嫁，利玉芳親身經驗過，
行嫁介各種儀節，利玉芳應該了解。
這首詩第一段作者寫出行嫁時節新娘介
飾品耳環、禁指、手扼代表係
傳統介情愛同祝福，長輩介叮嚀
係送分新娘介沉長介禮數，上新娘車
潑碗水、丟紙扇、講四句係客家人
行嫁時節還有保留介風俗，透過
作者介描寫，客家人行嫁介儀節片段，
賦予了意義，使得具體形象同意義
產生聯繫，表現出
當有客家味緒介行嫁時節意象。
●甜粄味 / 張芳慈
女詩人張芳慈介＜甜粄味＞這首詩，
反映出現代客家婦女對於上一輩
客家婦女在農業時代、父權架構底下
生活介可憐lau同情，還有些批判味緒：
硬翹翹介甜粄
撮做籤
攤在禾埕方曬燥
食到八月半
逐擺過年
婦娘儕將自家
當作磨石
迷迷迴到三光半夜
甜粄介味緒
細細口緊食
阿姆介艱苦啊
映入做妹儕心肝肚
續無半屑甜味
甜粄係客家人過年時節輒常打介、
應景介粄仔，做得拿來拜神、
也做得拿來食，用浮、（po11）用煎、
撮籤全部做得。這首詩介第一段講著
打好無食忒介甜粄（甜粿、年糕）
硬翹翹拿來撮籤、曬燥，做得食到八月半；
第二段想起這甜粄係阿母過年時節
磨到三光半夜介結果；第三段甜粄係甜介，
毋過想到阿母一生人介艱苦，食起來
遂無半點甜味。這首詩拿客家人
甜粄介製作、處理，表現出
客家婦女介操持同辛勞。
Tags: hakkapoem
